მართმადიდებლური ვებ საიტი.

პიმენოვის ღვთისმშობელი

თამაზი — Thu, 22 Dec 2011 06:53:35 GMT

პიმენოვის ღვთისმშობლის სასწაულთმოქმედი ხატი მოსკოვის ხარების ეკლესიაში იმყოფება.
ხატი აქ 1381 წელს მოსკოვის მიტროპოლიტმა პიმენმა ჩამოაბრძანა და სახელწოდებაც მისი სახელის მიხედვით მიიღო.
პიმენოვის ღვთისმშობლის ხატმა მრავალი სასწაული აღასრულა. ერთხელ ერთ-ერთი ვაჭრის, სახელად ტიტრუმას სახლში პარაკლისის გალობის დროს ხატიდან საკვირველმა და კეთილსურნელოვანმა მირონმა გამოჟონა. მისი ცხების შემდეგ მრავალი სნეული განიკურნა. რის შემდეგაც ხატს მირონმდინარე ეწოდა.
სასწაულთმოქმედი ხატის ხსენება ძველი სტილით 19 ივნისს, ახალი სტილით კი 6 ივნისს აღინიშნება.

წმიდა სინოდმა ახალი პირადობის მოწმობებზე იმსჯელა

თამაზი — Thu, 22 Dec 2011 06:46:59 GMT

საქართველოს საპატრიარქოში დღეს გამართულ სხდომაზე წმიდა სინოდმა ჩვენს ქვეყანაში ახალი პირადობის მოწმობების გაცემის საკითხზე იმსჯელა. სხდომის მდივნის, საჩხერისა და ჭიათურის მიტროპოლიტი დანიელის (დათუაშვილი) თქმით, აღნიშნულ საკითხზე ეკლესიის მოსაზრება საზოგადოებისთვის ცნობილი უახლოეს მომავალში გახდება.
წმიდა სინოდის სხდომას უწმიდესი და უნეტარესი, სრულიას საქართველოს კათოლიკოს- პატრიარქი ილია მეორე თავმჯდომარეობდა.
ახალი თაობის პირადობის მოწმობის გაცემა 2011 წლის 1-ლი აგვისტოდან დაიწყო და სამოქალაქო რეესტრის ინფორმაციით, ამავე წლის ნოემბრის მონაცემებით, ID ბარათების მიღების მსურველებისთვის 72 000–მდე ელექტრონული პირადობის (ბინადრობის) მოწმობა დაიბეჭდა.
საქართველოში სულ ოთხი ტიპის ID ბარათი გაიცემა: საქართველოს მოქალაქის პირადობის ელექტრონული მოწმობა, მუდმივი/დროებითი ბინადრობის ელექტრონული მოწმობა და დროებითი ბინადრობის ელექტრონული მოწმობა ლტოლვილისათვის.
სამოქალაქო რეესტრის ინფორმაციით, ახალი ელექტრონული პირადობის მოწმობის აღება არ არის სავალდებულო, ძველი მოწმობები ვადის გასვლამდე ძალაში რჩება, თუმცა ახალი დოკუმენტების აღების შემთხვევაში მოქალაქე მიიღებს ID ბარათს. ის მაღალტექნოლოგიური, გაყალბებისგან მაქსიმალურად დაცული პირადობის დამადასტურებელი დოკუმენტია. ID ბარათი ელექტრონული დოკუმენტების ციფრულად ხელმოწერის საშუალებას იძლევა და მოქმედი კანონმდებლობის თანახმად, ასეთ დოკუმენტებს იურიდიული ძალა აქვს.
საზოგადოების დამოკიდებულება ახალი პირადობის მოწმობების შესახებ არაერთგვაროვანია. მოსახლეობის დიდი ნაწილი მიიჩნევს, რომ ID ბარათი მოქალაქეთა კონტროლის მექანიზმად იქცევა, რაც ადამიანთა უფლებების უხეში დარღვევაა.

ლოცვები დილის 9 საათზე

თამაზი — Wed, 21 Dec 2011 14:46:59 GMT

მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან, ამინ.
ფსალმუნი 50
1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა აჰხოცე უჰსჯულოებაი ჩემი. 2. უფროის განმბანე მე უჰსჯულოებისა ჩემისაგან და ცოდვათა ჩემთაგან განმწმიდე მე. 3. რამეთუ უჰსჯულოებაი ჩემი მე უწყი, და ცოდვაი ჩემი წინაშე ჩემსა არს მარადის. 4. შენ მხოლოსა შეგცოდე და ბოროტი შენ წინაშე ვჰყავ; რაითა განჰმართლდე სიტყუათაგან შენთა და სძლო შჯასა შენსა. 5. რამეთუ ესერა უჰსჯულოებათა შინა მიუდგა და ცოდვათა შინა მშვა მე დედამან ჩემმან. 6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე. 7. მასხურო მე უსუპითა და განვსწმიდნე მე, განმბანო მე და უფროის თოვლისა განვსპეტაკნე. 8. მასმინო მე გალობაი და სიხარული, და იხარებდენ ძუალნი დამდაბლებულნი. 9. გარე-მიაქციე პირი შენი ცოდვათა ჩემთაგან და ყოველნი უჰსჯულოებანი ჩემნი აჰხოცენ. 10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა. 11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან. 12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე. 13. ვასწავლნე უჰსჯულოთა გზანი შენნი და უღმრთონი შენდა მოიქცენ. 14. მიხსენ მე სისხლთაგან, ღმერთო, ღმერთო ცხოურებისა ჩემისაო, იხარებდეს ენაი ჩემი სიმართლესა შენსა. 15. უფალო, ბაგენი ჩემნი აღახუენ, და პირი ჩემი უთხრობდეს ქებულებასა შენსა. 16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს. 17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს. 18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი. 19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შესწირნენ საკურთხეველსა შენსა ზედა ზუარაკნი.
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ალილუია, ალილუია, ალილუია დიდება შენდა ღმერთო;
ალილუია, ალილუია, ალილუია დიდება შენდა ღმერთო;
ალილუია, ალილუია, ალილუია დიდება შენდა ღმერთო ჩვენო, დიდება შენდა.
ღვთისმშობელი ქალწულო, გიხაროდენ, მიმადლებულო მარიამ, უფალი შენთანა, კურთხეულ ხარ შენ დედათა შორის და კურთხეულ არს ნაყოფი მუცლისა შენისა, რამეთუ მაცხოვარი გვიშევ სულთა ჩვენთა.
ამინ!

პატრიარქის სტუმრობა შატილში

თამაზი — Wed, 21 Dec 2011 14:35:35 GMT

"შევეხები მთის პრობლემებსაც; მოგეხსენებათ, საქართველო ოდითგან მთისა და ბარის ერთობით იყო ძლიერი. ბარს მთა იცავდა, მთას კი ბარი განამტკიცებდა. გახსოვთ თუნდაც შაჰ-აბასის შემოსევა, როდესაც კახელების საარაკო მამაცობის მიუხედავად, რიცხვით მრავალმა მტერმა ეს მხარე მაინც დაიკავა, მთიელების სახალხო ლაშქარი შეიყარა და თავგანწირული ბრძოლით სპარსელნი განდევნა. ბახტრიონის აჯანყების სახელით ცნობილმა ამ მოვლენამ, არა მარტო ბარი იხსნა სრული იავარქმნისაგან, არამედ მთიულეთი და თუშ-ფშავ-ხევსურეთიც გადაარჩინა.
სამწუხაროდ, კომუნისტურ პერიოდში, საქართველოს მთიანეთი დაიცალა და დღეს მიტოვებულია არა მარტო სოფლები, არამედ მთელი კუთხეები; კერძოდ: თუშეთი, ხევსურეთი, ფშავის ნაწილი, რაჭა…, სადაც ზაფხულის პერიოდის გარდა, მოქმედ სოფლებში თითო-ოროლა ოჯახი ან სულაც, ერთი ადამიანი სახლობს.
არადა ამ ტერიტორიების განსაკუთრებულობას ისიც განაპირობებს, რომ ისინი საზღვრისპირა რეგიონებია და მათ სტრატეგიული დანიშნულებაც აქვთ. ვინაიდან არსებული მდგომარეობის მთავარი მიზეზი სოციალურ-ეკონომიკური პირობებია, სახელმწიფოებრივი თანადგომისა და მატერიალური მხარდაჭერის გარეშე, ბუნებრივია, მოსახლეობის დაკავება ვერ მოხერხდება.
ეკლესია, თავისი შესაძლებლობის ფარგლებში, ცდილობს, წვლილი შეიტანოს აღნიშნული მხარეების გამოცოცხლების საქმეში და, ამ მიზნით, აქ მონასტრებს აარსებს.
მთის თემის აქტუალობიდან გამომდინარე, ამ რამდენიმე თვის წინ, შედგა ჩემი მოგზაურობაც თუშეთსა და ხევსურეთში და კიდევ ერთხელ დავრწმუნდი, რომ აღმოსავლეთ მთიანეთს (და რაჭასაც) დროულად უნდა გაეწიოს სერიოზული დახმარება, თორემ შემდეგ, ათჯერ მეტი ძალისხმევა იქნება საჭირო მდგომარეობის გამოსასწორებლად.
ჩვენ ადრეც შევთავაზეთ ხელისუფლებას და ახლაც შევახსენებთ, რომ იქნებ ერთ-ერთ საქმედ იქცეს აქაურ დაუსახლებელ ტერიტორიებზე მცირე დანაშაულის მქონე პატიმრებისთვის მიმაგრების ადგილებისა და სოფლების მოწყობა (თავისი მეურნეობებით), რაც დასაქმების პრობლემასაც ნაწილობრივ გადაწყვეტს და დაცულ ზონებსაც შექმნის.
ბუნებრივია, აქ უნდა ასევე განვითარდეს მესაქონლეობა, მეცხვარეობა, მეფუტკრეობა, მეთევზეობა, ხელსაქმე, მიწის ერთობლივი დამუშავებისათვის კი, უნდა შეიქმნას კოოპერატივები.
სვანეთში და საქართველოს სხვადასხვა ქალაქებსა და სოფლებში განხორციელებული სახელმწიფო პროგრამები იმედს იძლევა, რომ ეს საკითხიც აქტუალური გახდება და მდგომარეობა გამოსწორდება” – საშობაო ეპისტოლე უწმიდესისა და უნეტარესის, სრულიად საქართველოს კათოლიკოს – პატრიარქის ილია II.

გალობა ქრისტე აღსდგა არაბულად

თამაზი — Sun, 27 Nov 2011 13:38:36 GMT

მდიდრის მიერ ძველი ბეღელის დანგრევა და ახალის აგება.ვერცხლისმოყვარეობაზე

თამაზი — Sun, 27 Nov 2011 13:30:18 GMT

მამა რევაზი სიხარულიძის საკვირაო ქადაგება მდიდრის მიერ ძველი ბეღელის დანგრევა და ახალის აგება.ვერცხლისმოყვარეობაზე.

პატრიარქის სადღესასწაულო ქადაგება 13.11.2011

თამაზი — Sun, 20 Nov 2011 15:34:18 GMT

სრულიად საქართველოს კათოლიკოს-პატრიარქი, უწმიდესი და უნეტარესი ილია II.
სახელითა მამისათა და ძისათა და წმიდისა სულისათა.
ჩვენთან არს ღმერთი!

გილოცავთ ამ უდიდეს საეკლესიო და საერო დღესასწაულს, 100 000 ქართველი მოწამის ხსენებას! ეს მსოფლიოს საოცრებაა! ისტორიას არ ახსოვს სხვა შემთხვევა, ერთდროულად 100 000 ქართველი ეწამებინათ. საქართველოსა და ქართველი ადამიანის ცხოვრებაში ყველაფერი არაჩვეულებრივია. იცით, რომ ჩვენმა დიდმა მეფემ, ვახტანგ გორგასალმა ასეთი რამ გვიანდერძა: ეძიებდეთ ქრისტესთვის სიკვდილსო. თუნდაც გავიხსენოთ დავით აღმაშენებლის დანაბარები: ყველამ დამადგით გულზე ფეხიო. მსგავს ანდერძს მეფე კი არა, უბრალო ადამიანი არ დატოვებს. ერთი ქართველი ქალბატონი, რომელიც რუსეთში იყო გაზრდილი და ახლა ამერიკაში ცხოვრობს, ერთხელ მეკითხება: ვინ არის ქართველი? როგორ შეიძლება დავახასიათოთ ქართველი ადამიანიო? ორი სიტყვით ვუთხარი: ქართველი ადამიანი არის ცეცხლი და წყალი. როგორი შეუთავსებელიცაა ცეცხლი და წყალი, ისეთი შეუთავსებელია ჩვენი თვისებები, სურვილები; ისეთი დიდია ამპლიტუდა ქართველი ადამინის ცხოვრებისა, რომ შეიძლება არც ერთ ერს არ ჰქონდეს.
დღეს წმიდათა 100 000-თა ქართველთა მოწამეთა ხსენებაა. ჯალალ ედ-დინმა, ამ უმკაცრესმა პიროვნებამ, დიდებით დაიწყო და ბოლოს სამარცხვინო სიკვდილი დაასრულა სიცოცხლე. ის მოკლა ადამიანმა, რომელსაც მისი სარტყელი მოეწონა. ქართლის ცხოვრებაში წერია: უმეტესი ათთა ბევრთა, რაც იმას ნიშნავს, რომ 100 000 ადამიანზე მეტი ეწამა. დღეს ჩვენ თაყვანს ვცემთ მათ ღვაწლს და ვიხსენებთ დიდი მადლიერებით. მართალია ასი ათასი ქართველი ეწამა, მაგრამ მათ განამტკიცეს რწმენა და ქართველობა სხვა ხალხში. როგორც ცნობილია, სიონის ტაძარს მოხადეს გუმბათი. იქ დადგეს ამ მზაკვარი ადამიანის – ჯალალ ედ-დინის ტახტი. სიონიდან მაცხოვრისა და ღვთისმშობლის ხატები გაიყვანეს და ხიდზე დააბრძანეს. ხალხს აიძულებდნენ, ფეხი დაედგათ მათთვის. ეს თითქმის არავინ გააკეთა, ამიტომ ეწამა ამდენი. ჰკვეთდნენ თავს და ყრიდნენ მტკვარში. მთელი მდინარე ქართველების სისხლით შეიღება. თოთქოს განმეორდა პირველი სამი საუკუნე. იცით, პირველ სამ საუკუნეში საშინლად დევნიდნენ ქრისტიანებს. თუმცა იმდენად დიდი იყო რწმენა ქრისტიანებისა, რომ ბავშვები, ახალგაზრდები დადიოდნენ ქუჩაში და ყვიროდნენ: მე ვარ ქრისტიანი! ეს გახლდათ სულის ზეიმი და განმეორდა აქაც!
მინდა, დღეს ორიოდე სიტყვით ვთქვა, თუ რა აძლევდა ძალას ამ ადამიანებს, საიდან პოულობდნენ ამ სულიერ მადლს? უპირველეს ყოვლისა, ისინი გენებით იყვნენ ქართველები. გენებს, წინაპრებს ძალიან დიდი მნიშვნელობა აქვს. ეს გადადის თაობიდან თაობაზე ისევე, როგორც ცოდვა და მადლი. და აი, იმდენად ძლიერია ქართველის გენეტიკა, რომ ვერავითარმა მტერმა ვერ მოსპო ქართული სული და ქართველი ადამიანი, სულიერი სიძლიერე დარჩა ჩვენში. რა ახასიათებს ქართველ ადამიანს? ერთ-ერთ ენციკლოპედიაში წერია, რომ ქართველები ყველაზე ლამაზი რასაა. ქართველ ადამიანს სულის სიმტკიცე ახასიათებს. თუ ადამიანი დაიჯერებს, რომ ესა თუ ის მოვლენა საჭიროა, ის სიცოცხლეს შესწირავს მის განხორციელებას. ქართველი ადამიანი მოსიყვარულეა. ღმერთმა დაგვაჯილდოვა ისეთი მადლითა და თვისებით, რომელიც გააჩნია თვით უფალს. წმ. იოანე ღვთისმეტყველი ამბობს: ღმერთი არის სიყვარული. აი, ეს სიყვარული მოგვანიჭა უფალმა და ჩვენ ვმადლობთ მას ამ დიდი წყალობისთვის. სიძულვილიც შეგვიძლია, მაგრამ ეს დიდხანს არ გრძელდება. არ ძალგვიძს, სიძულვილი და ბოროტება ვატაროთ გულში. ადამიანი, რომელიც ამას ატარებს, უპირველეს ყოვლისა, თვითონ ისჯება და იტანჯება. მე მინახავს ერთი ფილმი, რომელიც რუსეთში გაკეთდა. იქ ასეთი სიტყვებია: ქართველები ცოტათი ბავშვები არიანო. დიდება და მადლობა უფალს, რომ ჩვენ ბავშვები ვართ! თავად უფალი ამბობს: თუ არ იქნებით ბავშვები, ვერ შეხვალთ სასუფეველშიო. გენეტიკა, რწმენა, აღზრდა – ეს ყველაფერი მოქმედებს ჩვენს ცხოვრებასა და ადამიანის თვისებებზე. ქართველი ადამიანი მოწყალეა. შეიძლება არ შეგვიძლია შიო მღვიმელის მსგავსი დიდი მოღვაწეობა, მაგრამ შეგვიძლია მოწყალება, დახმარება. თუმცა ეს იმას არ ნიშნავს, რომ ჩვენში უარყოფითი არაა. უარყოფითიც ბევრია. ერთხელ გითხარით კიდეც, ჩამოწერეთ უარყოფითი თვისებები ერთ ფურცელზე და მეორეზე – დადებითი, მაგრამ ერთმა, ორმა გააკეთა ეს და მერე დაავიწყდათ. ახლა შეგახსენებთ, ველოდები თქვენგან ამ ნაწერებს. არა მარტო უნდა დაწეროთ უარყოფითი თვისებების სახელები, არამედ ისიც, როგორ გავთავისუფლდეთ ამ თვისებებისგან, როგორ დავძლიოთ თავს. წმიდა მამები ამბობენ: ვინც დაძლევს საკუთარ თავს, ის დაძლევს მსოფლიოს.
დღეს ბევრი ლაპარაკია იმის შესახებ, ბიძინა ივანიშვილი იყოს თუ არა საქართველოს მოქალაქე. რა თქმა უნდა, უნდა იყოს, რადგან ის ქართველია. ვფიქრობ, ყოველი სულითა და ხორცით ქართველი ადამიანი, საქართველოშია დაბადებული თუ უცხოეთში, საქართველოს მოქალაქე უნდა იყოს და ძალიან მაწუხებს, რომ ასეთმა უბრალო საკითხმა ასეთი არასასურველი კამათი გამოიწვია. დარწმუნებული ვარ, ჩვენი პრეზიდენტი გაითვალისწინებს ამას და მიანიჭებს მას მოქალაქეობას.
ასევე მინდა მოგახსენოთ, რომ ძალიან არასასურველი მდგომარეობაა ზემო სვანეთში. იქ, როგორც უვარგისი შენობა, დაანგრიეს ყოფილი მუზეუმი და ის ძვირფასი ხატები და ნივთები, რომელსაც ინახავდა ქართველი ხალხი, ჩაკეტეს სპეციალურად გაკეთებულ სათავსოებში. ეს იმდენად მოუხერხებელი და საშიშია, რომ შეიძლება ყინვამ, თოვლმა თუ თოვლჭყაპმა დააზიანოს ეს ხატები. ერთადერთი გამოსავალია: ხატები დაბრძანდეს წმ. ნიკოლოზის ეკლესიაში და იყოს იქ, სანამ აშენდება კარგი მუზეუმი, სადაც გათვალისწინებული იქნება ყველაფერი. ეს პრობლემა თითქოს უკვე წყდებოდა, მაგრამ დღემდე არაა მოგვარებული. ჩამოდიან სვანები თბილისში, აწუხებენ ხელისუფლებას, მოდინ ჩემთან. სულ უბრალო საკითხზე რაღაც არასასურველი მსჯელობა და კამათია. ხომ შეგვიძლია, გავუგოთ ერთმანეთს?! აუცილებლად უნდა გვესმოდეს ერთმანეთის! არ უნდა ვიფიქროთ, თითქოს საქართველო ვინმეზე მეტად გვიყვარს. ჩვენი სანუკვარი სამშობლო ისეთივე ძვირფასია სხვისთვის, როგორც ჩემთვის, უცხოეთში მყოფი ქართველებისათვის. იქ მცხოვრებ ქართველებს შეიძლება უფრო უყვართ სამშობლო, რადგან საკუთარ მიწა-წყალს არიან მოწყვეტილები. ირანში რომ ვიყავი, ფერეიდნელ ქართველებს შევხვდი. ისინი მეუბნებოდნენ: ღმერთს ებარებოდეთ, დაგვიკოცნეთ ქართული მიწაო. იქ სულ რაღაც საათი თუ საათნახევარი ვიყავით და ლაპარაკიც არ იყო საჭირო. მთელი დარბაზი ტიროდა და ჩვენც მათთან ერთად. ერთმანეთს რომ ვუყურებდით, ცრემლი გვახრჩობდა. სანამ დარბაზში ვისხედით, იქაურმა ქართველებმა მოტოციკლეტების ესკორტი მოამზადეს და რამდენიმე კილომეტრზე გვაცილებდნენ.
ხელისუფლების დახმარებით ერთი კარგი საქმე გავაკეთეთ: ვიყიდეთ სახლი, რომელიც დაახლოებით 10 ოთახისგან შედგება, სადაც ჩამოდიან ირანიდან ქართველები და პირველ დღეებში, სანამ ბინას ნახავენ, იქ იმყოფებიან. ეს ძალიან მახარებს და მშვიდად ვარ, რომ თავშესაფარი აქვთ.
კიდევ ერთხელ გილოცავთ ამ დიდებულ დღეს და შევთხოვ უფალს, ამ ასი ათასი ქართველი ადამიანის ლოცვით ღმერთმა დალოცოს, დაამშვიდოს და გაამთლიანოს საქართველო და ჩვენი ეკლესია.
ჩვენთან არს ღმერთი!

ნორავანი

თამაზი — Mon, 14 Nov 2011 14:19:00 GMT

ნორავანი მდინარე "არნაჩაის” ერთ-ერთი შენაკადის მიდამოებში მდებარეობს. ადგილს ძველად ვაიოც-ძორი "ქართველთა ველი” ერქვა, შემდეგ კი დარალაგიოზი, სოფელი ამაღუ. ის სომხეთის პროვინციაშია და ამ ქვეყნის სამხრეთ-აღმოსავლეთით მდებარეობს.
მონასტერი ნორავანი თავად ორბელიანებს დაუარსებიათ (აქვეა მათი საგვარეულო სამარხები). როდესაც უბედურება ეწიათ და განიდევნენ საქართველოდან, მეფე გიორგი III – ის მიერ.
ორბელიანებმა შექმნეს და გაამდიდრეს ეს მონასტერი ისე, რომ იერარქიულად მისი ადგილი თათეს მონასტერსაც კი უსწრებდა, პირველობდა. (თათეს მონასტერი იყო რეზიდენცია სომეხთა კათოლიკოსის შემდეგ მდგომი სიუნიის არქიეპისკოპოსისა).
მთავარი ტაძარი წმიდა იოანე ნათლისმცემლის სახელობისაა. მონასტრის ჩრდილოეთის კედელთან მიდგმულია უგუმბათო ეკლესია, ოთხ ბურჯზე. აქ თავად ტარსაიჭ ორბელიანის საძვალე-განსასვენებელია. (ეს ეკლესია თვითონ ტარსაიჭს აუგია, ან "აუშენა” ქვრივმა მინა-ხათუნმა). სამარხი – ეკლესია ტარსაიჭის ძმის სუმბათის სამარხზეა აგებული.
ტარსაიჭ-ორბელიანის ეკლესიის გარე ფასადზე, სარკმელთან, ჯვრის გადაკვეთასთან წარწერაა: "უფლის ნებით, მე, თავადთა თავადი, ტარსაიჭმა ავაგე ეს სამარხი ჩემი ძმისთვის სუმბათისთვის 744(1295) წელს”.
ნორავანის მონასტრის ახლოს არის ორსართულიანი ტაძარი. "სიუნიის ისტორიაში” აღწერილია, რომ აქ დაკრძალულნი არიან: ელიკუმ I, შვილიშვილი მისი ლიპარტი VI, შვილები მისი: ელიკუმ II, სუმბატ, ტარსაიჭი. შვილები ტარსაიჭ ორბელიანისა” ელიკუმ III, ფახრადულახ, მეორე თანამეცხედრე ტარსაიჭ ორბელიანისა მინა-ხათუნი და სხვანი…
ნორავანის მონასტერი ფლობდა უძრავ საგანძურს, მოტანილს შეწირულების სახით, საერო და საეკლესიო ხელისუფლებისგან, ძირითადად, თავადთა ორბელიანთაგან. წარწერებში მოიხსენიებიან შემწირველნიც და შეწირულებანიც.
ნორავანის წარწერებიდან მნიშვნელოვანია ტაძრის შიგნით, ჩრდილოეთის კედელზე წარწერა: ორბელიანთა საგვარეულო-სახლის განადგურების შედეგი მეფე გიორგი III – ის მიერ.
"670(1221)წ. ღვთის ნებით, მე ლიპარიტი, შვილი ელიკუმისა და შვილიშვილი დიდი (ლიპარიტი) ორბელიანისა, მამა ჩემი ელიკუმი, დევნილნი აფხაზთა მეფის მიერ მოვედით ათაბაგ ელდიღუზის სამფლობელოში და მან მოგვაქცია ყურადღება და მისცა მას დიდი ქალაქი გამიანი (ჰამადანი). მე, ლიპარიტი, შვილი მისი, ჯერ ახალგაზრდამ მივიღე რწმენა წმ.გრიგოლისა წარვუდექი დიდსა ათაბაგსა ივანე (მხარგრძელს), რომელმაც ჩემი მემკვიდრეობიდან მიბოძა ჰ(ხ)რაშკაბერდის ციხე (ხრაშკა-ბერდ) თავისი შემოსავლებით და მე ავაგე ეს მონასტერი ნორავანი” …

ყოვლადწმიდა ღვთისმშობლის ხატი “ბარძიმი შეუსმელი”

თამაზი — Mon, 14 Nov 2011 14:14:12 GMT

ტროპარი

სამართლად შეუვრდებით დღეს ღუთივსახიერსა და ყოვლადსასწაულთმოქმედსა ხატსა ყოვლადწმიდისა ღუთისმშობელისასა და მართლითა გულითა უგალობთ ზეციურსა ბარძიმსა აღუვსებელსა მოწყალებისასა და მორწმუნეთა ერთათვის სასწაულთა მიმთუალველსა.

რამეთუ ჩუენცა მხილველნი და მსმენელნი მათნი ვიხარებთ სულითა და ხმითა გალობისათა ვხმობთ: ყოვლადმოწყალეო დედუფალო, ვნებანი და წყლულებანი ჩუენნი განკურნენ, ევედრე ძესა შენსა – ქრისტესა ღმერთსა ჩუენსა, რაჲთა აცხოვნნეს სულნი ჩუენნი.
"ბარძიმი შეუსმელად” წოდებული ხატის გამოცხადება 1878 წ. მოხდა. ტულის გუბერნიის ეფრემოვოს მაზრის ერთ-ერთი გლეხი, გადამდგარი ჯარისკაცი, მემთვრალეობის ვნებას ჰყავდა დაპყრობილი. მან მთელი თავისი სარჩო-საბადებელი ლოთობაში გაანიავა და მალე სრულიად გაღატაკდა. უზომო სმისაგან მას ფეხები სავსებით წაერთვა, მაგრამ მაინც განაგრძობდა სმას. ერთხელ სიზმრეულ ჩვენებაში ბერი ეჩვენა და უბრძანა, ქალაქ სერპუხოვოს ყოვლადწმიდა ღვთისმშობლის მონასტერში ჩასულიყო, სადაც ღვთის დედის ხატი "ბარძიმი შეუსმელი” ბრძანდებოდა და მის წინაშე სავედრებელი პარაკლისი გადაეხადა.
მონასტერში მისულმა იქაურებს მოუთხრო თავის სიზმრეულ ჩვენებაზე და პარაკლისის გადახდა სთხოვა. მაგრამ მონასტერში არავინ უწყოდა ღვთისმშობლის ამგვარი ხატის შესახებ. მაშინ იფიქრეს, სადიაკვნის შესასვლელში რომ ხატი ჰკიდია, ის ხომ არ არისო? მართლაც, ხატის უკანა მხარეს ნახეს წარწერა: "ბარძიმი შეუსმელი”. მღვდელმთავარ ალექსის მოწაფეში – ღირს ვარლაამში – დასნებოვნებულმა გლეხმა მაშინვე შეიცნო სიზმრად ნანახი ბერი. სერპუხოვოდან შინ გლეხი სავსებით გამოჯანმრთელებული დაბრუნდა.
ღვთის დედის ხატის საკვირველი განდიდების ამბავი მთელს რუსეთს მოედო. მემთვრალეობის სენით შეპყრობილნი, მათი ახლობლები და ნათესავები იჩქაროდნენ ლოცვები აღევლინათ სნეულებისაგან განკურნებისათვის ღვთისმშობლის ხატის წინაშე, ბევრი კი იმისთვის მოილტვოდა მის წინაშე, რათა სამადლობელი შეეწირა დედუფლისათვის მისი უდიდესი წყალობის გამო.
იკონოგრაფიული თვალსაზრისით ხატი ღვთის დედის ერთ-ერთი უძველესი გამოსახულების "ორნატას” ტიპს მიეკუთვნება, ღვთიური ყრმა კი ბარძიმში ფეხზე მდგომია გამოხატული. ბარძიმი მაკურთხეველი ღვთიური ყრმით – ესაა ბარძიმი ზიარებისა, რომელიც სარწმუნოებით მისდამი მოლტოლვილებს ყველა იმ კურთხევას ანიჭებს, რომელიც უფლისა ჩვენისა იესუ ქრისტეს გამომსხნელმა ღვაწლმა მიჰმადლა კაცთა ცოდვილ მოდგმას. ბარძიმი ესე მართლაც შეუსმელია, ანუ დაულევნელი, რამეთუ ტარიგი მისი "მარადის იჭამების და არა დაილევის”. ხოლო დედა ღვთისა, ზეაპყრობილი ყოვლდაწმიდა ხელებით, ვითარცა ძალმოსილი მღვდელმთავარი, შუამავლობით აღუვლენს ღმერთს ზეცისა საკურთხეველში, ხსნისათვის ყოვლისა სოფლისა, ამ მსხვერპლს – თავის დაკლულ ძეს, რომელმაც მისთა სისხლთაგან მიიღო სისხლი და ხორცი, და სთავაზობს ჭამად მართალთა. იგი ყოველი ცოდვილისათვის ლოცულობს, ყველას ცხონება სურს, მდაბალი დამღუპველი მიდრეკილებების ნაცვლად იგი სულიერი სიხარულისა და ნუგეშის ამოუწურავი წყაროსაკენ მოუწოდებს. იგი ამცნობს, რომ სულიერი შეწევნისა და მოწყალების შეუსმელი ბარძიმი თითოეული მათგანისთვისაა განმზადებული, ვისაც კი ეს სურს.

მსვლელობა 100 000 მოწამის ხსენების დღე

თამაზი — Mon, 14 Nov 2011 14:11:19 GMT

სამების საკათედრო ტაძარში საზეიმო წირვა სრულიად საქართველოს კათოლიკოს-პატრიარქმა, მცხეთა თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა, უწმიდესმა და უნეტარესმა ილია მეორემ აღავლინა. ტრადიციისამებრ, პატრიარქის კურთხევითა და ახალგაზრდული მოძრაობა "დავითიანნის” ორგანიზებით მოეწყო საზეიმო მსვლელობა, რომელშიც მრევლი და სასულიერო პირები მონაწილეობდნენ.

ლოცვითი მსვლელობა 13:00 საათზე ვარდების (ყოფილი რესპუბლიკის) მოედნიდან დაიწყო და რუსთაველის გამზირის გავლით მეტეხის ხიდისკენ გაემართა, სადაც სრულიად საქართველოს კათოლიკოს-პატრიარქმა 100 000 მოწამის სახელზე სადღესასწაულო პარაკლისი გადაიხადა და მრევლთან ერთად, წამებულთა პატივის მისაგებად, მტკვარში ყვავილები გადაყარა. უწმინდესმა 100 ათას ქართველ მოწამეს ქვეყნისა და ქართველი ერის მფარველობა შესთხოვა.
კათოლიკოს-პატრიარქი დღეს ევროპის მოედანზე მოწყობილ კონცერტსაც დაესწრო, სადაც რამდენიმე ქართული სიმღერა შესრულდა. უწმინდესმა მეტეხის ხიდზე შეკრებილებს მიმართა და 100 ათასი მოწამის ღვაწლის შესახებ ისაუბრა.
თეონა როსტოშვილი (სიონის ღვთისმშობლის მიძინების საკათედრო ტაძრის მრევლი): "აქ მოვედი ჩემს პატარასთან ერთად. ლიზიკო ერთი წლისაა, მაგრამ მინდა, აქედანვე მონაწილეობდეს ქრისტიანულ დღესასწაულებში და მიიღოს ის უდიდესი მადლი, რაც დღეს აქ ტრიალებს.”
ანა გველესიანი (წმიდა სამების საკათედრო ტაძარის მრევლი): "დღეს უმნიშვნელოვანესი დღეა და ძალიან გახარებული ვარ, რომ ვმონაწილეობ ამ მსვლელობაში, ეს არის ქართველების ერთიანობის დღე, როდესაც ასი ათასი კაცი ჩვენი სარწმუნოებისთვის ეწამა.”
მაია ელოშვილი (ქაშუეთის ეკლესიის მრევლი): "ძალიან მნიშვნელოვანი დღეა. ბევრი მორწმუნე ადამიანი შეიკრიბა და პატივს მიაგებს 100 000 მოწამეს, რომლებმაც ხატები არ შეურაცხყვეს და სიცოცხლის ფასად დაიცვეს მართლმადიდებლური სარწმუნოება. ძალიან გახარებული ვარ და ყველას ვულოცავ ამ დღესასწაულს, ჩვენს ქვეყანას ვუსურვებ გაძლიერებასა და გამთლიანებას, 100 000 მოწამის მადლი შეეწიოს სრულიად საქართველოს.”
შეგახსენებთ, რომ ხორეზმის სახელმწიფოს გამგებელმა, ჯალალ ედ-დინმა 1227 წელს თბილისი აიღო. მისი ბრძანებით, სიონის საპატრიარქო ტაძარს გუმბათი მოხსნეს, სადაც ჯალალ ედ-დინისთვის ტახტი დადგეს. სიონის ტაძრიდან ღვთისმშობლისა და მაცხოვრის ხატები გამოაბრძანეს და მეტეხის ხიდზე გაიყვანეს. თბილისელებს აიძულებდნენ, ქრისტეს უარყოფის ნიშნად, ჯერ დაენერწყვათ, შემდეგ კი ფეხით გაეთელათ წმიდა ხატები, წინააღმდეგ შემთხვევაში კი თავების წარკვეთით ემუქრებოდნენ. 100 000-მა ქართველმა სულიერი სიმტკიცე გამოიჩინა. მათ ხატებს თაყვანი სცეს და ბრძანებას არ დაემორჩილნენ, რის გამოც ასი ათასი მოჭრილი თავი და თავწარკვეთილი სხეული მტკვარს გაატანეს. ამ დღეს ქართველმა ერმა სარწმუნოებისათვის თავდადებული 100 000 მფარველი შეიძინა.